Октябрь 28 2017

Куз каби

Эврилиш фаслинг келди-ку кузлангил кузли,
Сарғайган гиналарни тўккали буткул.
Суҳбатингни айлаб қизғишу қизғин сўзли,
Армонларни дилингдан хазон каби юл.
Дардчил барглар дардларини тукар намоён,
Бандлари инграгудек чирт-чирт узилиб.
Азобли минг аламларга бўлгудек поён,
Ва қадамлар тагида тўзғир эзилиб.
Фурсат етди, гардларингни тўккил атайлаб,
Узуқ хотираларинг кўчгай етилиб.
Ўкинч чок-чокларини сўккил-да авайлаб,
Умид куртакларига пайванд этилиб.
Гар, олтин куз ўз ижоди тасвирига лол,
Табиатнинг либоси ўзгариб боргай.
Тилла баргли куз сўқмоғи йўлига кўз сол,
Вақтнинг айни суратин куз чизиб бергай.
Саховатли борлиғини тўкиб-сочар куз,
Қут-барака, мурувват қўлларин тутиб.
Чор-атроф гўзаллигига тополмасанг сўз,
Мамнун бўл куз ширасин симириб-тотиб.
Нолимоқлик мумкинми кузнинг кўркидан, айт,
Йиғиб-териб атрофни кузатганда куз.
Боқ, табиат ўз-ўзини тозалаган пайт,
Куз каби янгиланиш режасини туз.
Муслима Ёдгорова

Октябрь 12 2017

Дилкушо сатрлар

-соя тубидаги нурни сезяпсизми? Демак,сиз бу ғалвали дунёда ишонаверинг яхшилик шафоати марҳаматига эришибсиз;
-яхши кўз билан яхшилик китобига боқинг, шунда яхшилик ҳикматлари қалбингизга оқиб кираверади;
-китоб номли эшикни топиб, уни қоқа олдингизм, уни оча олдингизми? Демак, сиз эзгулик останасида турибсиз, қатьият билан ичкарига киринг,шунда англаш эҳтиежига дуч келасиз;
-ҳаетдаги майда -чуйдалар устига оёқ қўйсангиз, юксак мақсадлар сари элтувчи зинапояга чиқиб олишингиз мумкин;
-Ёмғир томчиларини шукроналик уруғлари деб қабул қилсангиз, кўнглингизни камалак ўзининг нурли ранглари билан безайди ;
-раҳбарнинг йиғинларда ўз овозини баландлатишдан сақланишининг йўли битта,у ҳам бўлса кўпроқ китоб мутолаа қилиш орқали ҳает китобини ўқий олиш;
-сал нарсага ҳам жанжал қўзғаб юрадиган одам сершовқин ва дағал бўлади, чунки унинг кўнгил даштида «муроса»гиёҳи ўсмайди;
-тинмай гапирадиган вайсақи одам ўз тиниш белгиларини йўқотиб қўйган мужмал ёзув хатига ўхшайди, уни ўқиб тушуниш нохушлик ва ноқулайлик уйготади;
-турмуш икир-чикирларидан нолимоқлик ношукрлик аломатидир. Эҳтиет бўлинг, нолиганингиз сайин ўзингиз ҳам икир-чикирлар каби майдалашиб бораверишингиз мумкин;
-китоб мутолаа қилиш эҳтиежи қалбингизни безовта қиляптими? Демак, қалб оламингизни эзгулик шуьлалари ёрита бошлапти,ўқиш,уқиш ва фикрлашдан тухтаманг;
Фарқлаш мезонини, тафовут чегарасини топиш учун кишидан соғлом тафаккур талаб этилади;
-ижод бу- қийноқ булоғидан симириб ичмоқ,азоб довонидан дард чекиб ошиб ўтмок, чексизлик уммонига қулоч отиб шунғимоқ, олов тафтли саҳрода яйраб кезмоқ,хаёлотнинг сўнгсиз осмонида парвоз этмоқ, қувонч тоғларига тирмашиб чиқмоқ, зимистондан узоқлашиб нурга талпинмоқ, бўстонда ранг-баранг ҳам хушбўй гуллар сараламоқ ва инсонларга уларни дасталаб тутмоқ,ўз қалбига пинҳон сайр этиб, Уни эзгулик нақшлари билан безамоқдир.
Муслима Ёдгорова